عمرك سمعت عن الجريمة الكاملة

 عمرك سمعت عن الجريمة الكاملة ؟ طب بلاش ، عمرك شوفت قاتل بيبعت للشرطة تفاصيل جريمته كاملة و مكانها بعد ما بينفذها علطول !! ، لو إجابتك هي لأ ، يبقي تعالي احكيلك !قصة حقيقية حصلت في ستينات القرن الماضي 

١- سفاح سان فرانسيسكو 

( أنا أُحب أن أقتل الناس لأنه أمر مُمتع جداً " !) 

في يوم مُمطر من أيام الشتاء الباردة سَنة ١٩٦٨ و خاصةٍ يوم ٢٠ ديسمبر ، اتنين متجوزين كانوا بيستمعوا لأحدث ألبومات الفرقة الغنائية " بي چيز " في ولاية سان فرانسيسكو الأمريكية و تحديداً في طريق اسمه " طريق العُشاق " ، فجأة بدون أية مُقدمات لقوا شخص جنب العربية  و طلع مُسدس و ضربهم هما الاتنين بالنار ! ، جريمة بشعة بدون سبب واضح و يزيد الغموض لما تعرف ان الراجل و الست دول يُعتبر عواجيز مفيش دافع قوي يخليهم يتقتلوا ! ، اتجهت الشرطة سريعاً لمكان الحادث و تولت شرطة سان فرانسيسكو الموضوع ، طوال اليوم بيحاولوا يوصلوا لأي دليل لكن مفيش ! المفاجأة الصاعقة هي ( طرد بريدي ) وصل لشرطة سان فرانسيسكو ! بيحكي فيه تفاصيل الجريمة الي حصلت ديه ! و في الاخر مكتوب جملة مُرعبة : 

" أنا أُحب أن أقتل الناس لأنه أمر مُمتع جداً " !

حاولت الشرطة تعرف اي تفاصيل قد تكون مستخبية جوه الطرد ده ، او حتي تعرف تتبع المُرسل لكن بلا فايدة ! من ٢٠ ديسمبر لحد تقريباً نص يناير مفيش أي أثر للقاتل !

الكارثة الأكبر بقي ان بعد الجريمة ديه بحوالي شهرين تلقت شرطة سان فرانسيسكو بلاغ بجريمة قتل حصلت في إحدي الحدائق العامة ، برده لاتنين متجوزين ! و الي أكد للشرطة تماماً ان القاتل واحد انها تلقت نفس الطرد البريدي في نفس اليوم ! بتفاصيل الجريمة و في اخر الرسالة نفس الجملة الي سابها في الجريمة الأولي " انا احب أن أقتل الناس لأنه أمر مُمتع جداً " ! ، استجوبت الشرطة جميع من كانوا في الحديقة اليوم ده تقريبا لكن بلا أثر واحد ! قاتل محترف !!!

بعدها بمدة قصيرة لقوا برده اتنين متجوزين متكتفين جنب احدي البحيرات في سان فرانسيسكو و في جسمهم أكتر من ١٠ طعنات ! و استمر البحث كتيير جدا و لكن بدون فايدة و بدون أثر علي الإطلاق !

كان ممكن تعتقد ان القاتل ده هو قاتل متسلسل بيستهدف بس المتجوزين لأنه مُعقد مثلا من الجواز أو أي سبب تاني ، لكن الجريمة المرادي كسرت الاعتقاد ده ، لما لقوا سواق تاكسي مضروب في منتصف راسه تماماً ، و طبعا الشرطة ربطت بسهولة انه نفس القاتل المتسلسل لما اتبعت طرد لمقر الشرطة ، نفس تفاصيل الجرايم السابقة ..

اخر جريمة للقاتل ده هي انه المرادي بعت طرد للشرطة قبل جريمته بيهدد فيها انه هيطلق النيران علي اتوبيس مدرسة أطفال ، طبعا علي وجه السرعة الشرطة اتخذت جميع سُبل الحماية الممكنة و لحسن الحظ محصلش حاجة 

حققت الشرطة مع اكتر من ٢٥٠٠ شخص في الولاية لمدة ١٠ شهور عشان توصل لدليل واحد و لكن موصلوش لحاجة رغم انهم كانوا شاكين جدا في خمس اشخاص بالتحديد ان ممكن يكون القاتل واحد منهم لكن الطب الشرعي وقتها كان ضعيف جدا مش بنفس قوة انهاردة ، عشان كده مكنش فيه أدلة كافية . 

بعدها الجرايم توقفت لوحدها لحد دلوقتي ! 

الموضوع مُرعب لما تلاقي شخص بيقتل لمجرد القتل بس بدون هدف واضح ، عاوزك تسرح بخيالك بقي و تفكر ياتري ايه الي حصل لمجرم زي ده ؟ هل يا تري حد قتله عشان كده الجرايم وقفت ؟ هل هو زهق فقرر بيطل ؟ هل هو لسه عايش لحد دلوقتي ؟ الله اعلم !

القصة ديه جزء من سلسلة اسمها ( الجريمة الكاملة ) و هي بإختصار جرائم لم يتم العثور علي فاعلها ! تم تنفيذها بإحترافية شديدة  ! عشان تكمل باقي السلسلة متنساش تعمل فولو للاكونت ده و كل فترة هتنزل جريمة كاملة ملهاش حل لحد دلوقتي !!

متنساش تعمل لايك و شيرو كومنت لو عجبتك و خش البيدج هتلاقي قصص رعب زي ديه و اكتر 😉

#beboOo